dhuup aa.i nahin makan men kya
abr gahra hai asman men kya
aah kyuun be-sada hai honTon par
lafz baaqi nahin zaban men kya
ho gaya nilgun badan saara
tiir zahrile the kaman men kya
saare kirdar saath chhoḌ ga.e
aa gaya moḌ dastan men kya
jhulsa jhulsa hai kyuun badan saara
aa ga.i dhuup sa.eban men kya
na-shanasa hai chand se kyuun dil
sirf taara tha asman men kya
roz-o-shab kis ki raah takti ho
‘mina’ ab tak hai kuchh guman men kya
Leave a Reply