Dhup Aai Nahin Makan Mein Kya

dhuup aa.ī nahīñ makān meñ kyā

abr gahrā hai āsmān meñ kyā

aah kyuuñ be-sadā hai hoñToñ par

lafz baaqī nahīñ zabān meñ kyā

ho gayā nīlgūñ badan saarā

tiir zahrīle the kamān meñ kyā

saare kirdār saath chhoḌ ga.e

aa gayā moḌ dāstān meñ kyā

jhulsā jhulsā hai kyuuñ badan saarā

aa ga.ī dhuup sā.ebān meñ kyā

nā-shanāsā hai chāñd se kyuuñ dil

sirf taarā thā āsmān meñ kyā

roz-o-shab kis kī raah taktī ho

‘mīnā’ ab tak hai kuchh gumān meñ kyā

Leave a Comment