Akhtar Saeed Khan
sar men sauda-e-vafa rakhte hain
ham bhi is ahd men kya rakhte hain
vasta jis ka tire gham se na ho
ham vo har kaam uTha rakhte hain
bin khili ek kali pahlu men
ham bhi ai bad-e-saba rakhte hain
but-kade vaalo tumhen kuchh bolo
vo to chup hain jo ḳhuda rakhte hain
ghairat-e-ishq koi raah nikal
zulm vo sab pe rava rakhte hain
kya saliqa hai sitamgari ka
ruḳh pe daman-e-haya rakhte hain
chara-sazan-e-zamana ai dil
zahar dete hain dava rakhte hain
naghma-e-shauq ho ya nala-e-dil
dard-mandana sada rakhte hain
dil ki ta.amir ko Dha kar ‘aḳhtar’
vo mohabbat ki bina rakhte hain
Leave a Reply