sar-ba-sar shaḳh-e-dil hari rahegi
ta-abad aankh men tari rahegi
main ne qissa hi paak kar Daala
ishq hoga na ḳhud-sari rahegi
aks bante rahenge pesh-e-nazar
surat-e-a.ina-gari rahegi
satr-dar-satr ḳhuun jalaya hai
lafz men raushni bhari rahegi
ḳhamushi oḌh li daraḳhton ne
arzu-e-suḳhan-vari rahegi
koi manzil talash li jaa.e
ab kahan tak ye be-ghari rahegi
baagh men hai qayam ka mauqa.a
sab parindon se dilbari rahegi
kya hamesha bhaTakna hai mujh ko
kya hamesha subuk-sari rahegi
zindagi se Dari rahungi main
zindagi saa.e se Dari rahegi
chand agar Duub bhi gaya ‘mahin’
taaq par chandni dhari rahegi
Leave a Reply