kyuun na ham soch ke sanche men hi Dhal kar dekhen
vo jo qaa.em hai to phir ḳhud ko badal kar dekhen
go masafat hai kaThin aur na rasta koi
lekin is haal men achchha hai ki chal kar dekhen
ham mohabbat ko mukammal nahin zahir karte
vo hina-barg ko chuTki men masal kar dekhen
zindagi maut men maḳhfi hai yaqinan apni
misl-e-parvana chalo ham bhi to jal kar dekhen
ek koshish jo hai us ki use anjam to den
is ki ḳhvahish pe zara der ko Tal kar dekhen
‘sad’ logon se tavaqqo ho to kis baat pe ho
muung chhati pe mire roz vo dal kar dekhen
Leave a Reply