Saleem Shahid
mat puchh ki is paikar-e-ḳhush-rang men kya hai
ik ret ka Tiila pas-e-divar-e-qaba hai
ye ḳhalq ibarat hai lab-e-goya ki muhtaj
dekhen to faqat daagh hai bolen to sada hai
aati hai sisakne ki dil-e-dasht se avaz
shayad ki rag-o-pai men koi abla-pa hai
hai bojh tan-e-ḳhasta ka divar-e-nafas par
goya ki mire ghar ka sutun mauj-e-hava hai
kuchh vahshat-e-iz.har lahu shaḳh pe laa.i
kuchh raas gul-e-zaḳhm ko ye ab-o-hava hai
ab aur koi nutq-o-zaban hon to kahun kuchh
is ḳhana-e-dar-band men kya hashr bapa hai
ab ijz-e-safar ki bhi malamat hai mire sar
har raah mire samne aghosh-kusha hai
phir tirgi-e-shab men nazar aa.i na.i shakl
ab dekh ki kis ḳhvab ka dar aankh pe va hai
Takra ke siyahi se palaT jaati hai surat
‘shahid’ dil-e-a.ina men divar si kya hai
Leave a Reply