Manzoor Arif
baam par aao kabhi mah-e-daraḳhshan ki tarah
chhup ke kya jalna charagh-e-tah-e-daman ki tarah
umr bhar vo dar-o-divar ke paband rahe
ghar se nikle hi nahin hain mire arman ki tarah
ab use dekhun to pahchan bhi shayad na sakun
dil mira TuuT gaya yaar ke paiman ki tarah
dasht ki raah to li alam-e-vahshat men magar
dasht bhi nikla mire ḳhana-e-viran ki tarah
qais ko dekha tha main ne sar-e-sahra ik din
sar se pa tak tha faqat dida-e-hairan ki tarah
nasha-e-mai ho ki husn-e-ruḳh-e-janan ‘arif’
sar chaḌhana na kisi ko kabhi ehsan ki tarah
Leave a Reply