Saghar Siddiqui
saaqi ki ik nigah ke afsane ban ga.e
kuchh phuul TuuT kar mire paimane ban ga.e
kaaTi jahan tasavvur-e-janan men ek shab
kahte hain log us jagah but-ḳhane ban ga.e
jin par na saa.e zulf-e-ghazalan ke paḌ sake
ehsas ki nigah men virane ban ga.e
jo pi sake na surḳh labon ki tajalliyan
duniya ke tajrabat se anjane ban ga.e
‘saghar’ vahi maqam hai ik manzil-e-faraz
apne bhi jis maqam pe begane ban ga.e
Leave a Reply