Nazm Tabatabai
koi mai de ya na de ham rind-e-be-parva hain aap
saqiya apni baghal men shisha-e-sahba hain aap
ghafil o hoshyar vo timsal-e-yak-a.ina hain
varta-e-hairat men nadan aap hain daana hain aap
kyuun rahe meri dua minnat-kash-e-bal-e-malak
nala-e-mastana mere asman-paima hain aap
hai ta.ajjub ḳhizr ko aur ab-e-haivan ki talab
aur phir uzlat-guzin-e-daman-e-sahra hain aap
manzil-e-tul-e-amal darpesh aur mohlat hai kam
raah kis se puchhiye hairat men naqsh-e-pa hain aap
haq se talib diid ke hon ham basir aise nahin
ham ko jo kotah-nazar samjhen vo na-bina hain aap
gul hama-tan-zaḳhm hain phir bhi hama-tan-gosh hain
be-asar kuchh nala-ha-e-bulbul-e-shaida hain aap
hirs se shikva karun kya haath phailane ka main
kahti hai vo apne hathon ḳhalq men rusva hain aap
ham se ai ahl-e-tana.a.um munh chhupana chahiye
dam bhara karte hain ham aur a.ina-sima hain aap
Leave a Reply