samundar ki khushbu mere pet
men ghul rahi hai
vo zara fasle par hi bichha hai
aur khamoshi se asman ko khud ko
takte hue dekh raha hai
main ek kamre men
surkh qalin par yoga aasan karte hue
ankhen munde
apne dil ki avaz sun rahi huun
jo aaj sukun se hai
jaise koi bahut thak kar soya ho
vasvason ke darmiyan se nikal kar
main apne dil ki is asudgi par
khush huun
jaise koi maan apne bimar bachche ko
aram se sote dekh kar
chain ka saans leti hai
mere pet men samundar ki khushbu
ek vaqt ki ghiza ki tarah mujhe zinda kar rahi hai
us vaqt se pahle
jab ek baar phir mira dil sote se
jaage
apne vasvason se khelne ke liye
Leave a Reply