Syed Amin Ashraf
saman-e-faragh jal raha hai
sahra ho ki baagh jal raha hai
hai shaḳh-e-nihal par sameTe
bulbul ho ki zaagh jal raha hai
hathon men dahak raha hai pyala
honTon men ayagh jal raha hai
jo fasl-e-junun men khil raha tha
vo qarya-e-dagh jal raha hai
vahshat bhi fusun-e-mushtarak hai
dil ho ki dimagh jal raha hai
phir bhi hai chahar-su andhera
sadiyon se charagh jal raha hai
Leave a Reply