Kuldeep Kumar
samajh rahe the jise ham ki bevafa hoga
kise ḳhabar thi ki vo aadmi ḳhuda hoga
tumhare pahle bhi ankhon men intizar hi tha
tumhare ba.ad yahi hoga aur kya hoga
abhi bhi dard sa uThta hai mujh men mumkin hai
zara sa ishq miri zaat men bacha hoga
main ik charagh hava men jala ke lauT aaya
phir us ke ba.ad na jaane ki kya hua hoga
yahan ki ab-o-hava men ajab ḳhamoshi hai
tamam shahr kisi dasht par basa hoga
vahi nazare vahi log chal yahan se chalen
fasil-e-shahr ke bahar to kuchh naya hoga
Leave a Reply