sakin-e-alam-e-barbad nahin samjhenge
arsh ki baten zamin-zad nahin samjhenge
ek muddat se qafas men rahe panchhi ḳhud ko
ho ke azad bhi azad nahin samjhenge
ye zamin hai yahan jannat nahin banne vaali
baat ye asr ke shaddad nahin samjhenge
muskurane ki adakari mujhe aati hai
mujh ko ghar vaale bhi nashad nahin samjhenge
‘abr’ de denge tujhe daad ye sunne vaale
is ghazal men hai jo fariyad nahin samjhenge
Leave a Reply