Raz Chandpuri
ham-nashin aisi koi tadbir honi chahiye
mere qabze men miri taqdir honi chahiye
ḳhatm hona chahiye ab qissa-e-dair-o-haram
ḳhanqah-e-zindagi ta.amir honi chahiye
imtiyaz-e-kufr-o-iman vaqt par ho ja.ega
davat-e-mai-ḳhana alamgir honi chahiye
aur baḌh jaa.en zara tishna-labi ki talḳhiyan
daur-e-saghar men abhi taḳhir honi chahiye
is tarah to nazm-e-alam muntashir ho ja.ega
ḳhud-parasti qabil-e-tazir honi chahiye
rahzan-e-iman hain donon shaiḳh ho ya barahman
in se bachne ki koi tadbir honi chahiye
markaz-e-husn-o-mohabbat matl.a-e-mehr-o-vafa
dil ke a.ine men ik tasvir honi chahiye
ta-ba-kai ye lan-tarani hoshiyar ai barq-e-tur
arzu-e-did ki tauqir honi chahiye
ta-ba-kai ye be-niyazi ai harifan-e-suḳhan
ab zaban-e-‘raz’ alamgir honi chahiye
Leave a Reply