sahil se biich samundar gahra paani
ghar miTTi ghar se bahar gahra paani
ye asrar hai zahir us ke hone ka
manzar ho ya pas-manzar gahra paani
dil ko kya dekhte ho ai dekhne vaalo
bahar ḳhushki aur andar gahra paani
Duub ke hi main shayad paar nikal ja.un
mera kya mere andar gahra paani
vaqt kab ik si halat rahne deta hai
ho jaata hai ret aksar gahra paani
asman par chand chamakta hai ḳhali
niche hai poshida gauhar gahra paani
be-payan karta huun ‘tur’ apne ko main
ik ḳhali tasht men bhar kar gahra paani
Leave a Reply