Poet
ham hi karte nahin zulfon ko tiri haar pasand
shaikh sahib ko bhi aata hai ye zunnar pasand
sabza-e-khat rahe us chehra-e-gul-rang se duur
zakhm-e-dil ko nahin ye marham-e-zangar pasand
jaun kaabe ko main kis tarah se ai vaiz-e-shahr
aa gaya mujh ko to ab khana-e-khummar pasand
go ki sau rang gulistan men dikhlae bahar
na karen gul ko tire talib-e-didar pasand
jo koi dard se tuk chashni rakhta hoga
usi ko aenge ‘joshish’ mire ashar pasand
Leave a Reply