sahar ko bhi miri mahfil men barhami na hui
tamam-rat hui dard men kami na hui
ghurur-e-husn tamanna-e-dil ka dushman tha
vo kaun din tha ki jis din hamahami na hui
umanD rahi hai mire dil ke saath barson se
ye koi nahr hui aankh ki nami na hui
main apne qatl ka shaki nahin hua to hua
ye ranj hai ki tire zulm men kami na hui
lahad pe aane ki andaz saikḌon the magar
ḳhush aa.i vaz.a unhen vo jo matami na hui
ulaT ulaT ga.e dil mere intiqal ke ba.ad
ye kya ki aap ki zulfon men barhami na hui
hazaron uTh ga.e aghosh-e-dahr se lekin
ajiib ghar hai zamana jahan ghami na hui
ye jism ruh-e-bahi-ḳhvah ka raha dushman
tamam-umr kabhi sulh-e-bahami na hui
har ek ke liye khincha rava nahin ‘saqib’
bhavon ka husn hi kya hai agar ḳhami na hui
Leave a Reply