Zafar Iqbal Zafar
safar ka silsila aḳhir kahan tamam karun
kahan charagh chala.un kahan qayam karun
sabhi ke sar pe hai rakkhi kulah naḳhvat ki
qadon ki bhiiḌ men kis kis ka ehtiram karun
hain jitne mohre yahan saare piTne vaale hain
kise main shah karun apna kise ghulam karun
ajiib shahr hai koi suḳhan-shanas nahin
mata-e-fikr main mansub kis ke naam karun
mira shanasa hai koi na ham-zaban hai koi
dayar-e-ghair men phir kis se main kalam karun
saja.un us ke liye ghar bichha.un palken ‘zafar’
vo aa raha hai to kuchh main bhi ehtimam karun
Leave a Reply