dil ke aivan men liye gul-shuda shamon ki qatar
nur-e-khurshid se sahme hue uktae hue
husn-e-mahbub ke sayyal tasavvur ki tarah
apni tariki ko bhenche hue liptae hue
ghayat-e-sud-o-ziyan surat-e-aghaz-o-maal
vahi be-sud-e-tajassus vahi bekar saval
muzmahil saat-e-imroz ki be-rangi se
yad-e-mazi se ghamin dahshat-e-farda se nidhal
tishna afkar jo taskin nahin paate hain
sokhta ashk jo ankhon men nahin aate hain
ik kada dard ki jo giit men dhalta hi nahin
dil ke tarik shagafon se nikalta hi nahin
aur uljhi hui mauhum si darban ki talash
dasht o zindan ki havas chak-e-gireban ki talash
Leave a Reply