safar jis men na ho to ham-safar achchha nahin lagta
gavara kar liya jaa.e magar achchha nahin lagta
jo sach puchho to ghar ki saari raunaq us ke dam se hai
vo jan-e-jan na ho ghar men to ghar achchha nahin lagta
hatak-amez nazron se koi dekhe jahan ham ko
qadam rakhna bhi us dahliz par achchha nahin lagta
ḳhudavanda tira banda jo mange us ko mil jaa.e
dua-e-dil ho mahrum-e-asar achchha nahin lagta
kisi ki justuju hai jo liye phirti hai barson se
hamen phirna agarche dar-ba-dar achchha nahin lagta
taḳhayyul ko par-e-parvaz dena bhi zaruri hai
baghair us ke ḳhalaon ka safar achchha nahin lagta
har ik pal nit-na.e jalvon ki shaida.i hon jo ankhen
koi ik chehra un ko rat-bhar achchha nahin lagta
kisi sarkash ke aage sar agar jabran bhi jhuk jaa.e
vabal-e-dosh ho jaata hai sar achchha nahin lagta
miri rudad-e-gham par tursh lahje men kaha us ne
ye rona roz-o-shab sham-o-sahar achchha nahin lagta
rulata bhi hai vo zalim mujhe phir ye bhi kahta hai
tira daman hai kyuun ashkon se tar achchha nahin lagta
uchhala karte hain aksar ‘vaqar’ auron ke aibon ko
vo jin ko parda-poshi ka hunar achchha nahin lagta
Leave a Reply