saaf qasid ko vaan javab mila
mere khat ka yahi javab mila
aaj zarre ko aftab mila
ki mujhe saghar-e-sharab mila
kahte hain subh-dam vo dekh ke munh
ja-e-aina aftab mila
be-sabat apni bazm-e-aish jo hai
shisha-e-mai ki ja habab mila
bakht ne paai jab ki bedari
mere pa-e-talab ko khvab mila
ho gaya dil jo aabla saaqi
samjhe ham shisha-e-sharab mila
gor bhi khud rahi hai mehr ke saath
aap khush ho gae khitab mila
kab se ‘nasikh’ ye justuju hai mujhe
aaj vo khanuman-kharab mila