saf-e-matam pe jo ham nachne gaane lag jaa.en
gardish-e-vaqt! tire hosh Thikane lag jaa.en
vo to vo us ki ma.iyat men guzara hua pal
jo bhula.en to bhulane men zamane lag jaa.en
mire qadir! jo tu chahe to ye mumkin ho jaa.e
raftagan shahr-e-adam se yahan aane lag jaa.en
bazm-e-duniya se chalun aisa na ho sab mire yaar
ek ek kar ke mujhe chhoḌ ke jaane lag jaa.en
ḳhvahish-e-vasl! tira kya ho jo ham sal-ba-sal
ashra-e-soz gham-e-hijr manane lag jaa.en
ham samajh paa.e na ‘fartash’ mizaj-e-ḳhuban
dil chura.en to kabhi ankhen churane lag jaa.en
Leave a Reply