sadme guzre iiza guzri
hijr men tere kya kya guzri
hijr men jaan rahi ya guzri
‘rind’ kaho tum par kya guzri
kya kahun tujh se hal-e-furqat
guzri jo kuchh jaana guzri
ulfat-e-but ne kar diya kafir
ye kya bar-e-ḳhudaya guzri
aa.e nahin tum arsa guzra
man.a kiya kis ne kya guzri
guzre jis dam ham duniya se
ham ne jaana duniya guzri
bahr-e-jahan men ziist hamari
shakl-e-habab-e-dariya guzri
kis se kahiye kaun sunega
kya kya guzra kya kya guzri
kahta tha main ishq se baaz aa
dekha jo dil-e-shaida guzri
mar bhi ga.e ham vah-ri ghaflat
un ko ḳhabar bhi na asla guzri
ab to hai shaghl-e-ḳhun-ashami
naubat-e-jam-o-mina guzri
kafir par bhi na guzre aisi
ham par jo but-e-tarsa guzri
vaqt-e-marg ye ji men guzra
zindagi apni beja guzri
naala kaisa aah nahin ki
kya kya tujh bin iiza guzri
TuuT chuka hai rishta-e-ulfat
yaas hai ab to tamanna guzri
dusra tujh sa koi na dekha
pesh-e-nazar ik duniya guzri
dekh ke hal-e-mariz-e-furqat
halat ham pe masiha guzri
qabil-e-did na dekhin ankhen
muddat nargis-e-shahla guzri
ghash kyuun aaya ham se to kahiye
kya kuchh hazrat-e-musa guzri
kyun-kar jheli afat-e-furqat
‘rind’ kaho dil par kya guzri
Leave a Reply