saḌkon par ik sail-e-bala tha logon ka
main tanha tha us men kya tha logon ka
duniya thi be-faiz rifaqat ki basti
jivan kya tha ik sahra tha logon ka
sud-o-ziyan ke mashkize par laḌte the
dil ka dariya suukh gaya tha logon ka
main pahuncha to mera naam faza men tha
hanste hanste rang uḌa tha logon ka
nafrat ki tahriren har su likkhi thiin
divaron pe rang chaḌha tha logon ka
main in ko vo mujh ko dekh ke Darte the
shahr-e-sitam tha ḳhauf baja tha logon ka
kuchh logon ne nafrat boi logon men
phir saḌkon par ḳhuun baha tha logon ka
hansna bhule hansi uḌana siikh liya
pahle kab ye rang hua tha logon ka
ab jo kahen to kis ko bavar aa.ega
mehr-o-muravvat taur raha tha logon ka
duniya men tha ‘ahmad’ duniya se aajiz
ḳhud ko ganva kar soch raha tha logon ka
Leave a Reply