raushni sub.h ki ya shab ki syahi denge
jo bhi dena hai tumhen zill-e-ilahi denge
shaiḳh sahab to azal se hain dushman mere
kha ke qur.an ki qasam jhuTi gavahi denge
un se rakhiye na kisi mehr-o-vafa ki ummid
ye to aise hain ki suraj ko syahi denge
mausam-e-lutf-e-ata hai abhi maiḳhane men
jaam kya chiiz hai ye tum ko surahi denge
to hiqarat ki nazar se na unhen dekh miyan
ye phaTe kapḌe tujhe ḳhil.at-e-shahi denge
aisa lagta hai havaon ke ye pagal jhonke
ret par likkhi ibarat ko miTa hi denge
itni mayusi bhi achchhi nahin khoTe sikko
ik na ik din tumhen ham log chala hi denge
karke ye faisla ham ghar se chale hain ‘qaisar’
kuchh khari khoTi tumhen aaj suna hi denge
Leave a Reply