sadaqat ki yahan girti hui divar dekhi hai
sitam ki jiit dekhi hai karam ki haar dekhi hai
gharibon ki hi kashti ko hamesha Dubte dekha
amir-e-shahr ki kashti hamesha paar dekhi hai
amir-e-shahr un ankhon men kitna mohtaram hai tu
jin ankhon ne tiri zillat sar-e-bazar dekhi hai
in ankhon ne sar-e-neza koi bhi sar nahin dekha
magar dushman ke qadmon men phir ik dastar dekhi hai
ḳhamoshi ko hamari bai’at-o-ta.id mat samjho
agar tum ne hamari jur.at-e-inkar dekhi hai
buzurgon ne hamare jis pe sura-fat.h likkha tha
aja.ib ghar men kal ‘tashna’ vahi talvar dekhi hai
Leave a Reply