band-e-qaba ko khuban jis vaqt va karenge
khamyaza-kash jo honge milne ke kya karenge
rona yahi hai mujh ko teri jafa se har-dam
ye dil-dimagh donon kab tak vafa karenge
hai diin sar ka dena gardan pe apni khuban
jiite hain to tumhara ye qarz ada karenge
darvesh hain ham akhir do-ik nigah ki rukhsat
goshe men baithe pyare tum ko dua karenge
akhir to roze aae do-char roz ham bhi
tarsa bachon men ja kar daaru piya karenge
kuchh to kahega ham ko khamosh dekh kar vo
is baat ke liye ab chup hi raha karenge
aalam mire hai tujh par aai agar qayamat
teri gali ke har-su mahshar hua karenge
daman-e-dasht sukha abron ki be-tahi se
jangal men rone ko ab ham bhi chala karenge
laai tiri gali tak avargi hamari
zillat ki apni ab ham izzat kiya karenge
ahval-e-‘mir’ kyunkar akhir ho ek shab men
ik umr ham ye qissa tum se kaha karenge
Leave a Reply