Shahbaz Khwaja
sada-e-muzhda-e-la-taqnatu ke dhare par
charagh jalte rahe aas ke minare par
ajiib ism tha lab par ki paanv uThte hi
main ḳhud ko dekhta tha arsh ke kinare par
ajiib umr thi sadiyon se rahan rakkhi hui
ajiib saans thi chalti thi bas ishare par
vo ek aankh kisi ḳhvab ki tamanna men
vo ek ḳhvab ki rakkha hua sharare par
isi zamin ki janib palaT ke aana tha
utar bhi jaate agar ham kisi sitare par
mata-e-harf kahin be-asar nahin ‘shahbaz’
ye ka.enat bhi hai kun ke isti.are par
Leave a Reply