sach ki avaz ka suuli pe bhi radd hai had hai
tum agar jhuuT bhi bolo to sanad hai had hai
tum to suraj the pe hairat hai mujhe vaqt-e-zaval
ik diye se tumhen is darja hasad hai had hai
main ki masjud-e-mala.ik tha kabhi davar-e-hashr
mere a.amal par un se hi madad hai had hai
ham to barbadi ka saman kiye baiThe the
maslak-e-ishq-o-vafa men yahan had hai had hai
jin charaghon ki madad se main farozan hua huun
raushni se miri aaj un ko hi kad hai had hai
‘anjum’ is shahr ko da.ava tha zaban-dani ka
sha.ir is shahr men tu ek adad hai had hai
Leave a Reply