sabr vahshat-asar na ho jaae
kahin sahra bhi ghar na ho jaae
rashk-e-paigham hai inan-kash-e-dil
nama-bar rahbar na ho jaae
dekho mat dekhiyo ki aina
ghash tumhen dekh kar na ho jaae
hijr-e-parda-nashin men marte hain
zindagi parda-e-dar na ho jaae
kasrat-e-sajda se vo naqsh-e-qadam
kahin pamal-e-sar na ho jaae
mere taghir-e-rang ko mat dekh
tujh ko apni nazar na ho jaae
mere aansu na ponchhna dekho
kahin daman tar na ho jaae
baat naseh se karte darta huun
ki fughan be-asar na ho jaae
ai qayamat na aaiyo jab tak
vo miri gor par na ho jaae
mana-e-zulm hai taghaful-e-yar
bakht-e-bad ko khabar na ho jaae
ghair se be-hijab milte ho
shab-e-ashiq sahar na ho jaae
rashk-e-dushman ka faeda malum
muft ji ka zarar na ho jaae
ai dil ahista ah-e-tab-shikan
dekh tukde jigar na ho jaae
‘momin’ iman qubul dil se mujhe
vo but azurda gar na ho jaae
Leave a Reply