Ek Lahraati Hui Naddi Ka Sahil Hua Main

ek lahrātī huī naddī kā sāhil huā maiñ

phir huā ye ki har ik lahr se ghā.el huā maiñ

ab banāte haiñ mire dost nishāna mujh ko

tujh ko paane kī talab meñ kisī qābil huā maiñ

dil meñ is raaz ko tā-umr chhupā kar rakkhā

kis kī chāhat meñ thā shāmil kise hāsil huā maiñ

aa gayā ishq kā mafhūm samajh meñ us kī

us ke ḳhvāboñ meñ kisī roz jo dāḳhil huā maiñ

tū suḳhan-var hai to mujh ko bhī ye hāsil hai sharaf

lafz ban kar tire dīvān meñ shāmil huā maiñ

ek muddat se samajhne meñ lagā huuñ ḳhud ko

ya.anī ab apne liye bhī baḌā mushkil huā maiñ

Leave a Comment