sabab-e-dard-e-jigar yaad aaya
ya.ani vo tir-e-nazar yaad aaya
jhilmilane lage palkon pe nujum
phir koi rashk-e-qamar yaad aaya
apni manzil ke nishan paate hi
mujh ko aghaz-e-safar yaad aaya
dekh kar aa.ina kis soch men ho
kya koi ahl-e-nazar yaad aaya
bhulne vaale taḌap uTThega
main kisi vaqt agar yaad aaya
un ki pazeb udhar guunj uThi
shor-e-zanjir idhar yaad aaya
kyon ye bikhra liye gesu tum ne
kya koi ḳhak-basar yaad aaya
ek halat men basar ho na saki
shaam ko vaqt-e-sahar yaad aaya
hil gaya qalb-e-do-alam ‘jarrar’
kaun karta hua fariyad aaya
Leave a Reply