Sab Ke honTon Pe Ye Marne Ki Duaen Kaisi

Balmohan Panday

sab ke honTon pe ye marne ki dua.en kaisi

charagar tu ne hamen diin hain dava.en kaisi

ek hi pal men badalte hain manazir kya kya

ham tiri ankhen bana.en to bana.en kaisi

mai-kashi chhoḌ do jab bhuul chuke ho us ko

ab shifa mil hi ga.i hai to dava.en kaisi

aise halat men hansne ki tamanna kis ko

aise mahaul men jiine ki dua.en kaisi

andhe logon ko suna dete hain us ka chehra

aap ke log bhi dete hain saza.en kaisi

hanste-gate bhi udasi nahin chhoḌi main ne

chhoḌ deti hain jo bachchon ko vo maa.en kaisi