Basit Bhopali
sab ka.enat-e-husn ka hasil liye hue
baiTha huun dil men ishq ki mahfil liye hue
ik ik nazar farebi-e-sahil liye hue
har mauj samne hai mira dil liye hue
sarmaya-e-nashat gham-e-dil liye hue
huun ya.ani kaif-e-ishq ka hasil liye hue
phir kashti-e-hayat hai girdab-e-gham ke saath
tufan-e-be-niyazi-e-sahil liye hue
ji chahta hai thak ke kahin baiTh ja.iye
aghosh-e-pa-e-shauq men manzil liye hue
jab lutf hai ki main bhi rahun apne hosh men
aao miri nigah mira dil liye hue
vo mast-o-mahv apne farogh-e-nashat men
main mutma.in huun dard bhara dil liye hue
ai qais-e-did apne hijabon se hoshiyar
har parda-e-nigah hai mahmil liye hue
mujh par bhi kuchh karam nigah-e-neshtar-navaz
main bhi huun ek dard bhara dil liye hue
‘basit’ kisi jihat se na ho ashna magar
halka sa ik tasavvur-e-manzil liye hue
Leave a Reply