Shahid Kamal
sab hain masruf kisi ko yahan fursat nahin hai
sab zarurat hai magar kar-e-zarurat nahin hai
tujh se dushnam-tarazon ki himayat ke liye
ab mire paas koi harf-e-suhulat nahin hai
roz ik hashr bapa karte the jis ki ḳhatir
ham ye sunte hain ki vo fitna-e-qamat nahin hai
aks-e-ram-sazi-e-vahshat se use hai nisbat
ab to a.inon ko pahli si vo hairat nahin hai
kis liye tark-e-ta.alluq pe nadamat hai tujhe
ai miri jaan mujhe koi shikayat nahin hai
raqs-e-ashob ajab dekha hai galiyon men tiri
ai mire shahr yahan koi salamat nahin hai
hukm hai ḳhana-e-vahshat ke makinon se kaho
ab yahan saans bhi lene ki ijazat nahin hai
ḳhun-baha mangne valon ko nadamat hai bahut
mere qatil ko magar koi nadamat nahin hai
ramz-o-asrar se ḳhali nahin hote mire sher
ye alag baat ki ‘shahid’ ko vo shohrat nahin hai
Leave a Reply