sab gham kahen jise ki tamanna kahen jise
vo iztirab-e-shauq hai ham kya kahen jise
hai johd-e-munfarid sabab-e-karobar-e-dahr
ik iztirab-e-qatra hai dariya kahen jise
ne.amat ka e’tibar hai husn-e-qubul se
ishrat bhi ek gham hai gavara kahen jise
milta nahin hai ahl-e-junun ka koi suragh
bas ek naqsh-e-pa hai ki sahra kahen jise
pahle hayat-e-shauq thi allah-re inqalab
ab e’tibar-e-gham hai tamanna kahen jise
hai mere ka.enat-e-tasavvur ka ik fareb
vo jalva-e-ḳhayal ki duniya kahen jise
kuchh kam-nigahiyan hain tajalli ki aaḌ se
aisi bhi ik nigah-e-tamasha kahen jise
tanha.i-e-ḳhayal se ‘tabish’ ye haal hai
aisa koi nahin ki ham apna kahen jise
Leave a Reply