Athar Shakeel
rut miri basti ko is darja bhi barani na de
shahr-e-dil ke sabza-zaron ko ye virani na de
mil nahin paata kabhi phulon se ghunchon se mizaj
yuun mahak bhi apni un ko rat-ki-rani na de
ḳhud-kalami karni hai ḳhud se hi sargoshi mujhe
ab koi surat mujhe jaani ya anjani na de
sim-gun ḳhvabon ko le kar ho na sar-gardan kabhi
is ḳharabe par to apni jaan ai jaani na de
be-niyazi hi tiri hasil mohabbat ka sahi
chashm-e-hairat ko to phir bhi dard ka paani na de
TuTte hi nashsha-e-ulfat na rah jaa.en khuli
chashm-e-ummid-e-karam ko aisi hairani na de
chand hi kya kahkasha.en bhi karen aa kar tavaf
us pari-paikar ko aisa husn-e-la-sani na de
narm-o-nazuk paudh kumhla ja.egi itna to soch
in jaḌon ko apni nafrat ka to ye paani na de
Leave a Reply