rukne ke liye dast-e-sitam-gar bhi nahin tha
afsos kisi haath men patthar bhi nahin tha
bahar jo nahin tha to koi baat nahin thi
ehsas-e-nadamt magar andar bhi nahin tha
jannat na mujhe di to main dozaḳh bhi na lunga
momin jo nahin tha to main kafir bhi nahin tha
lauTa jo vatan ko to vo raste hi nahin the
jo ghar tha vahan vo to mira ghar bhi nahin tha
anjam to zahir tha safen TuuT chuki thiin
salar-e-muazzaz sar-e-lashkar bhi nahin tha
afsos qabile pe khula ghair ke hathon
sardar ke pahlu men to ḳhanjar bhi nahin tha
jo baat kahi thi vo bahut saaf kahi thi
dil men jo nahin tha vo zaban par bhi nahin tha
ye sach hai qasida na ‘hilal’ ek bhi likkha
ye sach hai ki main shaah ka naukar bhi nahin tha
Leave a Reply