ruḳh tumhara ho jidhar ham bhi udhar ho ja.enge
tum se bichhḌenge agar to dar-ba-dar ho ja.enge
zindagani ke safar men lutf hoga tab nasib
ham-ḳhayal-o-ham-nava jab ham-safar ho ja.enge
asmanon ka safar ham tai karenge ek roz
jab hamare hauslon men bal-o-par ho ja.enge
sadgi yunhi agar laade rahe to ek din
sab tumhare apne tum se be-ḳhabar ho ja.enge
dekhna jis din unhen maqsad samajh men aa.ega
manzilon ki justuju men rahguzar ho ja.enge
paude hain urdu adab ke ab-o-dana Daliye
aane vaale kal men saa.e aur samar ho ja.enge
saaqi saghar ki zarurat hi kahan mere liye
teri ankhon ke hi pyale pur-asar ho ja.enge
vo na ja.enge kabhi ‘mahtab’ zulmat ki taraf
vaqt par anjam se vaqif agar ho ja.enge
Leave a Reply