Asra Rizvi
vo shaḳhs phir kahani ka unvan ban gaya
main dard likh rahi thi vo divan ban gaya
gardish men charon samt rahe us ke lafz lafz
kuchh yuun hua ke aaj vo mehman ban gaya
ḳhush thi main us ko baḳhsh ke kirdar phir naya
vo meri dil-lagi ka bhi saman ban gaya
mahfil uruuj par thi ki nazren ulajh paḌin
sab jan-bujh ke bhi vo anjan ban gaya
jab us ka ishq ḳhuun ki dharon men hal hua
mere liye to lulu-o-marjan ban gaya
itne taghayyurat ke allah ki panah
har karb mere ishq ka tavan ban gaya
lazzat to aankh ne bhi uTha.i thi saari raat
ik ḳhvab meri ruuh ka sohan ban gaya
kuchh aur ramz mujh pe kiye jaa.en ashkar
us ki taraf se ye naya farman ban gaya
‘asra’ qadam sambhal ke rakhna zamin par
shaitan kah raha hai ki rahman ban gaya
Leave a Reply