ruḳh se fitrat ke hijabat uTha deta hai
aa.ina TuuT ke patthar ko sada deta hai
azmat-e-ahl-e-vafa aur baḌha deta hai
gham-e-musalsal ho to phir gham bhi maza deta hai
dil dhaḌakta hai to pahron nahin sone deta
niind aati hai to ehsas jaga deta hai
tum ne shayad kabhi is baat ko socha hoga
vaqt hathon ki lakiren bhi miTa deta hai
jo mire qatl ke darpai tha na jaane kab se
aaj vo bhi mujhe jiine ki dua deta hai
apne kirdar pe maujon ko bhi sharm aati hai
jab koi Duub ke sahil ka pata deta hai
gham ki taufiq bhi sab ko nahin milti ‘gauhar’
ye vo ne.amat hai jo mushkil se ḳhuda deta hai
Leave a Reply