ruḳh-e-bahar pe aks-e-ḳhizan bhi kitni der
muḳhalifat pe tula asman bhi kitni der
kisi ka naam kisi ka nishan bhi kitni der
ho jism ḳhaak to phir ustuḳhvan bhi kitni der
shikast-o-reḳht ki is manzil-e-pareshan men
yaqin ki umr bhi kitni guman bhi kitni der
bandha hai ahd jo tegh-o-gulu ke beach to phir
larazti kanpti nannhi si jaan bhi kitni der
nikal chalo hai abhi sahl rasta yaaro
ki mehrban hai to ye mehrban bhi kitni der
bara-e-shab bhi kushada hai mera darvaza
ki sub.h aa.i to ye mehman bhi kitni der
suḳhan-vari na sahi mo.ajiza sahi lekin
ye tarz-e-fikr ye husn-e-bayan bhi kitni der
Leave a Reply