izhar-e-junun bar-sar-e-bazar hua hai
dil dast-e-tamanna ka giraftar hua hai
behosh-e-gunah jo dil-e-bimar hua hai
ik shauq-e-talab sa mujhe talvar hua hai
sahra-e-tamanna men mira dil tujhe pa kar
shahr-e-havas-alud se bezar hua hai
behosh-e-khirad ko junun agah karega
ye jazb jo amada-e-paikar hua hai
main vasl ki shab raqs-e-gham-amez karungi
ik dard mira ham-shab-e-bedar hua hai
is darja nasha kab hai ki gumrah rahun main
ye hosh mira dushman-e-dushvar hua hai
tuuti hai ye kashti to mire saath safar ko
vo jan-e-masafat mira tayyar hua hai
is khubi-e-qismat pe mujhe naaz bahut hai
vo shakhs miri jaan ka talabgar hua hai
main aina-e-dil ko sar-e-khvab hi todun
is dasht-e-shanasa ka ye israr hua hai
kuchh kaam kab aaya hai mira girya-e-shab bhi
israf-e-dil-o-jan mira be-kar hua hai
Leave a Reply