ahmad-husain-mail

Ru-E-Taban Mang Mu-E-Sar Dhuan Batti Charagh

ru-e-taban maang mu-e-sar dhuan batti charagh

kya nahin insan ki gardan par dhuan batti charagh

kuchh na puchho zahidon ke batin-o-zahir ka haal

hai andhera ghar men aur bahar dhuan batti charagh

dud-e-afghan-o-rag-e-jan-o-suvaida dil men hai

band hai qindil ke andar dhuan batti charagh

tuur par ja kar charagh-e-tur kyuun dekhe koi

kya makanon men nahin patthar dhuan batti charagh

ho muafiq kyunkar ai parvane saya-gustari

hai mukhalif zer-e-bal-o-par dhuan batti charagh

kanpta hai haath tasir-e-dil-e-betab se

main karun raushan to ho muztar dhuan batti charagh

surat-e-bakhshish dikhaven kaghaz-o-satr-o-huruf

ho amal-nama sar-e-mahshar dhuan batti charagh

khizr hai bahri musafir ka manar-e-raushni

hai jahazon ke liye rahbar dhuan batti charagh

kya zarurat raushni ki be-khudi ki bazm men

zulf-e-saqi mauj-e-mai saghar dhuan batti charagh

shoala-ruyon ke muqabil rang jamta hi nahin

ud na jaae bazm se ban kar dhuan batti charagh

kis saliqe se hai raushan mahfil-e-arz-o-sama

asman par chand hai ghar ghar dhuan batti charagh

subh tak karte rahe raushan dilon se hamsari

shaam se raushan nafas ho kar dhuan batti charagh

ishq ki garmi ne phunka parde parde men mujhe

meri chadar men mira bistar dhuan batti charagh

zulf-o-rukhsar-o-nazar hain dushman-e-iman-o-din

lutne nikle hain vo le kar dhuan batti charagh

main vo taair huun jo huun kam-kharch aur bala-nashin

ek jugnu yaan hai aur ghar ghar dhuan batti charagh

shab ko ‘mail’ vaqt-e-araish musahib the yahi

phuul surma aaina zevar dhuan batti charagh

More Poems

Leave a Comment