tod lenge har ik shai se rishta tod dene ki naubat to aae
ham qayamat ke khud muntazir hain par kisi din qayamat to aae
ham bhi suqrat hain ahd-e-nau ke tishna-lab hi na mar jaaen yaaro
zahr ho ya mai-e-atishin ho koi jam-e-shahadat to aae
ek tahzib hai dosti ki ek meyar hai dushmani ka
doston ne muravvat na sikhi dushmanon ko adavat to aae
rind raste men ankhen bichhaen jo kahe bin sune maan jaaen
naseh-e-nek-tinat kisi shab su-e-ku-e-malamat to aae
ilm o tahzib tarikh o mantiq log sochenge in masalon par
zindagi ke mashaqqat-kade men koi ahd-e-faraghat to aae
kaanp utthen qasr-e-shahi ke gumbad thartharae zamin mabadon ki
kucha-gardon ki vahshat to jaage gham-zadon ko baghavat to aae