ḳhayal-e-zehn-shikan se zaban bhar aa jaa.e
ye ho to haath mire koi sher-e-tar aa jaa.e
hamare miTne se duniya hui hai aisi nihan
ki jaise biij se bahar koi shajar aa jaa.e
bana.i main ne jo be-surati ke patthar se
main kya karun isi murat pe dil agar aa jaa.e
chaman tamam to aahaT pe us ki jhuum uTha
yahan ye ḳhabt vo sail-e-hava nazar aa jaa.e
bhanvar musir hai ki aghosh-e-tang men dariya
tamam vus.at-e-naḳhvat sameT kar aa jaa.e
kashish bhi us ki ghazab ro.ab-e-husn bhi aisa
ki samna hi na kar pa.un vo agar aa jaa.e
rahoge phir bhi ‘muhib’ sat.h-e-bahr hi se do-char
agar tumhare liye tah bhi sat.h par aa jaa.e
Leave a Reply