Aziz Warsi
ah-o-nala dard-o-gham shor-e-fughan hai aaj bhi
ya.ani har bulbul asir-e-baghban hai aaj bhi
haa.e tum us ko samajhte ho gulistan ka harif
bijliyon ki zad men jis ka ashiyan hai aaj bhi
naqsh-e-azadi jabinon se numayan hai magar
daman-e-dil par ghulami ka nishan hai aaj bhi
manzil-e-maqsud par pahunche hain sab ke qafile
sirf meri sa.i-e-paiham ra.egan hai aaj bhi
us ke afsane pe koi tabsira be-sud hai
shadman ho kar bhi jo na-shadman hai aaj bhi
tu abhi apni haqiqat se nahin hai ashna
tere qabze men inan-e-do-jahan hai aaj bhi
main azal hi se samajhta huun tujhe apna ‘aziz’
ye tiri fitrat ki tu daman-kashan hai aaj bhi
Leave a Reply