ru-ba-ru sina-ba-sina pa-ba-pa aur lab-ba-lab
nachti shab men barahna ho ga.e kyuun sab ke sab
ḳhud-kushi kar li bhare gulshan men jis ne be-sabab
main ne sikha hai usi hamraz se jiine ka Dhab
hanste hanste ruuh ki avaz pagal ho ga.i
gumbadon ki ḳhamushi ne der tak khole na lab
pi rahe hain ḳhushnuma shishon men log apna lahu
aur kya hoga anokhe rang ka jashn-e-tarab
ai mohabbat ab to lauTa de mire sajde mujhe
marte dam tak zindagi karti rahi tera adab
laash suraj ki siyah kamre men thi laTki hui
mere ghar ka qufl khola shab ki tanha.i ne jab
‘prem’ teri sha.eri hai ya muqaddas ju-e-shir
tisha-e-taḳhliq jis se daad karta hai talab
Leave a Reply