ba.ad us ke mere ghar men aur kya rah ja.ega
bas kisi ke naam ka patthar laga rah ja.ega
kaan bhar ja.enge mere ḳhalvaton ke shor se
us ki yadon ka payambar bolta rah ja.ega
qaid kar lega koi bachcha paron ko kaaT kar
asman ki samt tota dekhta rah ja.ega
qatl kar Dalun main ḳhud ko sochta huun baar baar
mere hathon men magar ye ḳhuun laga rah ja.ega
ajnabi ban ban ke puchhunga main apni ḳhairiyat
aaj a.ina mira munh dekhta rah ja.ega
lams ke sho.alon men saari haDDiyan gal ja.engi
sirf kandhon par hamara sar dhara rah ja.ega
log virane men chhup ja.enge maare ḳhauf ke
bastiyon ke biich ullu bolta rah ja.ega
yuun uḌa.unga main sab ke samne apna mazaq
vo mire baare men kya kuchh sochta rah ja.ega
Leave a Reply