rote hain sun ke kahani meri
kaash sunte vo zabani meri
kaT gaya ghair mare nalon se
vah-ri saif-zabani meri
aa.ina dekh ke farmate hain
kis ghazab ki hai javani meri
phir tumhen niind nahin aane ki
kahin sun li jo kahani meri
baar kiya paanv tiri mahfil men
hai subuk tujh pe girani meri
hama-tan-gosh bane sunte hain
ghair kahta hai kahani meri
yaad a.unga jafa-karon ko
be-nishani hai nishani meri
iltija ek muqaddar do the
ghair ki maani na maani meri
hashr men kuchh na hua mujh se saval
vah-ri hech-madani meri
ab uThenge tire dar se mar kar
kabhi uThti nahin Thani meri
mere ash.ar fughan-e-dil hain
qadr karta hai ‘fughani’ meri
ḳhusrav-e-mulk-e-suḳhan-dani huun
daad hai baj-satani meri
dil men poshida rahegi kab tak
atish-e-shauq-e-nihani meri
tar-e-gesu se nazar ja uljhi
dekhna resha-davani meri
dil ki halat se ḳhabar deti hai
‘asar’ ashufta-bayani meri
Leave a Reply