rota hua vo baam mujhe yaad hai abhi
dil men bikharti shaam mujhe yaad hai abhi
phir kaise ho gaya hai vahi shaḳhs itna ḳhaas
samjhe the jis ko aam mujhe yaad hai abhi
ham aur saath saath kabhi is tarah milen
jaise ḳhayal-e-ḳham mujhe yaad hai abhi
vo guftugu nigahon nigahon men yaad hai
sargoshi men salam mujhe yaad hai abhi
kaise sanbhal sanbhal ke baḌa dekh-bhal kar
ham tum the ham-kalam mujhe yaad hai abhi
kya din the ḳhvahishon ki baḌi rel-pel thi
jazbon ka izhdiham mujhe yaad hai abhi
puchha ki mere dil men iqamat hai kab talak
us ne kaha mudam mujhe yaad hai abhi
puchha ki zindagi men mira ham-safar hai kaun
main ne kaha ghulam mujhe yaad hai abhi
ab tak vo za.iqa bhi mujhe yaad hai ‘yashab’
ham ne piya tha jaam mujhe yaad hai abhi
Leave a Reply