Rota Hua Wo Baam Mujhe Yaad Hai Abhi

rotā huā vo baam mujhe yaad hai abhī

dil meñ bikhartī shaam mujhe yaad hai abhī

phir kaise ho gayā hai vahī shaḳhs itnā ḳhaas

samjhe the jis ko aam mujhe yaad hai abhī

ham aur saath saath kabhī is tarah mileñ

jaise ḳhayāl-e-ḳhām mujhe yaad hai abhī

vo guftugū nigāhoñ nigāhoñ meñ yaad hai

sargoshī meñ salām mujhe yaad hai abhī

kaise sañbhal sañbhal ke baḌā dekh-bhāl kar

ham tum the ham-kalām mujhe yaad hai abhī

kyā din the ḳhvāhishoñ kī baḌī rel-pel thī

jazboñ kā izhdihām mujhe yaad hai abhī

pūchhā ki mere dil meñ iqāmat hai kab talak

us ne kahā mudām mujhe yaad hai abhī

pūchhā ki zindagī meñ mirā ham-safar hai kaun

maiñ ne kahā ġhulām mujhe yaad hai abhī

ab tak vo zā.iqa bhī mujhe yaad hai ‘yashab’

ham ne piyā thā jaam mujhe yaad hai abhī

Leave a Comment